Helbestvan Muslum Aslan, di sala 1974an de li gundê Hatxê ku girêdayî Nisêbînê ye ji dayîk bûye. Dibistana xwe ya seretayî û ya navîn li Nisêbîne xwendiye û ji ber rewşa siyasî xwendina xwe ya lîseyê nêvcî hiştiye. Hezkirina bapîrê wî ya li hember Cegerxwîn tesîreke mezin li Muslum Aslan kiriye ku berê wî jî daye xwendin û nîvisandina helbestan. Bapîrê wî pirtûkên Cegerxwîn derdixe û dide dest wî, lê dûra wan dîsa vedişêre; ji ber ku bi Kurdî ne, wê demê qedexe ne. Wisa bi bîr tîne wan rojan: “Ez bi qîmetdayîna bi min pir kêfxweş dibûm. Lê ew kêfxweşî herdem nîvco dima; bapîrê min careke din pirtûkên xwe dixistin veşartekan…”

Di sala 1991ê de ji ber siyasetê hatiye girtin û li zindanên Amed, Çankiri û Mereşê bi tevayî 10 salan di girtîgehan de maye. Di sala 2002an de di Kovara Utopyayê de berpirsyariya wêşanê kiriye. Di 2004an de li Nisêbînê di nav xebatên kovarên bi navê “Dem” û “Nûbîn” de cih stend. Helbest, nivîs û ceribînên wî di kovarên weke Guney, Utopya, Yarati, Tîgrîs, Kovara W, Tîroj, Dilop û gelek kovar û rojnameyên dîtir de hatine weşandin. Heya niha 3 yê helbestan, 1 ceribîn 4 pirtûkên wî hatine weşandin. Di heman demê Diljen Ronî, Raperîn û Hasan Tercan hin helbestên wî kirine stran. Muslum Aslan endamê PENa Kurd û Komeleya Nivîskarên Kurd a Amedê ye.

Berhemên Muslum Aslan:

Ayna, helbest, Weşanxaneya J&J, 2005

Rû, helbest, BM Yayincilik(Weşanên BM), 2009

Nehîrler Zîndanlara Dokulur(Çem Diherikin Zindanan), Ceribîn, Esmer Yayıncılık(Weşanên Esmer), 2013

Aram, helbest, Weşanxaneya J&J, 2021