Yekbûn; bestekar, sazkar, stranbêj û produktor e. Di 17ê Adara 1979an de li Stenbolê ji dayik bûye. Wek malbat ji Mêrdînê ne, biçûka 6 xwîşk û bira ye. Di malek ku hertim sin’etkarê weke Aram Tîgran û Miradê Kinê guhdarî dikirin mezin bûye. Di sala 1989an bi awayekî amatorî dest bi mûzîkê kiriye, dema li Stenbolê Navenda Çanda Mezopotamya vebûye, êdî xebatên xwe li wir berdewam kiriye. Heta sala 1997an bi “Koma Çîya” re di gelek şev, şahî, konser û organizasyonan de bi awayekî aktîf xebitîye.

Li Zanîngeha Marmara ya Stenbolê di beşa Mamostatîya Mûzîkê de perwerdehîya deng xelas kiriye. Di sala 2002yan de bi yekemîn berhema xwe ya solo ya bi navê “Nîrwana” derket pêşberî hezkirîyên xwe. Di vê navberê de tevlî gelek xebatên hunerî bûye. Bi mûzîk û vokalîstîya xwe tevlî xebatên rêzefilmên “Ihlamûrlar Altinda”, “Esîr Kalpler û Asî” bûye, reklam û jenerîkên mûzîkan amade kiriye. Ji bo komek dansê, muzîkên taybet jî amade kirine. Berhema wê bi xwe jî di nav de ji gelek berhemên hûnerî re muzîksazî (aranjor) kiriye.

Di sala 2007an de duyemîn berhema wê ya hunerî bi navê “Kejê” derket. Ji bo hinek stranan (Were Were, Xwezî Dîsa, Esîr Kalpler, Kejê, Yar Eman, Nikarim, Haro Baso, Şervana Kurd im,) klîp kişandine.

Ji bo televîzyona Zagros Tv li bernameya “Mêvan Show” derhêneriya muzîkê kiriye. Di Trt Kurdî de bernameya pêşbazîya dengî ya bi navê “Strana Xwe Bêje” de wek jurî cîh girtiye.

Ser navê Kurdistanê li Festîwala Pusan li başûrê Korea bi stranên xwe beşdar bûye.

Di sala 2013ê de berhemek ji bo zarokan bi navê “Zarok” amade kiriye. Albumek din bi navê “Dilop” derxistiye û ji bo albumê klîbek kişandiye.