Rûnak Resûlpûr

Hunermend û wênesaza Kurd Rûnak Resûlpûr, sala 1978ê li Mahabadê ji dayik bûye. Li bajarê Ûrmiyeyê di zanîngehê de beşa grafîk û dîzaynê qedandiye. Du salan li kovara Mahabadê weke dîzaynêr kar kiriye. Demekê di dibistanê de mamostetiya resîmê ya zarokan kiriye, lê ji ber ku bi Kurdî ders dane, mahne lê kirine û dawî li kare wê anîne.

Dûra ji rojhelat penaberî başurê Kurdistan bûye û 11 salan li wir jiyane. Sala 2008a li Zanîngeha Silêmaniyê Beşa Seramîkê ya Akademiya Hunerê xwendiye. Li Başûrê Kurdistanê dîzayna gelek bergên pirtûkan, logo û afîşan çêkiriye. Di hin filman de weke dîzaynêr kar kiriye û her wiha di filmê “Mandû” yê Îbrahîm Sîedîyî de weke dîzaynera cil û bergan kar kiriye. Di sala 2014a de tê Amedê û heya 2018a li wir dijî. Bêhtir li ser wêne, pirtûkên zarokan û anîmasyonan kar dike. Heta niha wêneyên zêdeyî 20 pirtûkan û hin anîmasyon amade kirine. Di sala 2018an de tev hevjînê xwe Seywan Saedian koçî Swêdê dikin û niha li vir dijîn.

Dê û bavê Rûnak Resûlpûr jî wêne çêker bûne û destek dane zarokê xwe jî ji bo pêşketina wan. 2 birayê Rûnak Resûlpûr jî grafîkerê serkeftî ne. Ji ber ku meyla wê li ser hebû, ji dema lîse ve dest bi kare grafîkeriyê kiriye û her berdewam e di hunera xwe de. Dema li Amedê, di 2017an de pêşangeha wêneyên xwe vekiriye û dahata vê pêşangehê ji erdhejzedeyên Kîrmanşanê re şandiye. Niha jî li weşanxaneyek Kurdî ya li Swêdê grafiker-dîzaynerîyê dike, di ber re jî karê hunera xwe yê taybet didomîne.